كلنا نعرف قصة سندريلا بس النهاردة هحكى لكوا قصة سندريلا الجديدة 2009 بس طبعا برجو ان سندريلا متزعلش أوكى اسمعوا القصة:-
.................................................. .................................................. ...........................
كان يامكان.. ياسعد يا اكرام.. فى العام السادس بعد الألفية التانية بعد الميلاد.. بنت جميلة فقيرة اسمها سندريلا - عايشة عيشة غريبة وصعبة مع مرات أبوها وبناتها
مرات ابوها كانت مفترية لانها اتجوزت ابوها بغد ماكان ساعى عندها فى الشركة وضرته من ام العيال وضرت معاه سندريلا عشان تخدم عليها وعلى بناتها
وفى ليلة من ذات الليالى حدثت القصة اللى كلنا عارفينها.
.
سندريلا: وانتوا رايحين فين ومتزوقين كده ليه وكل واحدة عاملة نيولوك.
مرات ابوها: رايحين حفلة الأمير فى هيلتون رمسيس- هيختار واحدة عشان يتجوزها.
سندريلا: خدونى معاكوا -بليز.
مرات ابوها: تروحى فين يا خايبة بلبسك وهدومك دى- عايزة ارجع ألاقى البيت بيبرق.
ومشيت مرات الاب ومعاها البنات وسابوا سندريلا حزينة بتعيط.
وفجأة طلعت الساحرة من الميكروويف.
الساحرة: مالك يا سندريلا.
سندريلا: كان نفسى اروح معاهم الحفلة بس هدومى مقطعة وموبايلى كارت ولابسة شبشب بصابع.
الساحرة: ولايهمك.
وطلعت الساحرة من جيبها الموبايل وطلبت مدام لولو وطلبت منها فستان وجزمة اخر موديل وخط بيزنيس.
فرحت سندريلا ولبست وحطت(الاى شادو) و رشت البرفان.
بس الساحرة قالت لها فى شرط واحد انها لازم ترجع الساعة 12 بالضبط.
الساحرة: انا صعيدية ودمى حامى ومعنديش بنات تتأخر لو اتأخرتى هترجعى بلبسك القديم وسط الناس.
سندريلا: حاضر حاضر.
خرجت سندريلا من البيت ولقت الساحرة مجهزة حتة(بى ام دبليو) فركبت سندريلا وراحت على الحفلة ولفت جمالها كل الموجودين وأول ما الأمير شافها عينه طلعت عليها وراح طلب يرقص معاها(سلو) على أغنية عمرو دياب وماله لو ليلة كنا بعين.....شوية والتليفون رن فى جيب سندريلا(ترن ترن ترن) لفت نمرة الساحرة بتديها ميسد عشان الساعة بقت 12 وقعدت سندريلا تجرى بجنون وفردة الجزمة اتخلعت منها وخدها الأمير المعجب ونادى على الوزير.
الأمير: يا وزير تامر.
الوزير: أمرك يا مولاى.
الأمير: خد الجزمة دى اسحب صورتها على الاسكانر ونزل الصورة فى كل الجرايد وعلى الويب سايت واكتب ان صاحبة الجزمة عليها التوجه للقصر الملكى.
بنات كتير جدا راحوا ويا سبحان الله الجزمة مجتش على مقاس ولا واحدة فيهم تحس ان سندريلا رجلها رجل معزة شوية وشافت سندريلا الاعلان على ميلودى وراحت القصر واتجوزت الأمير وعاشوا فى سبات ونبات وخلفوا توأم ملتصق وشوية بنات.
النهاية..
الرئيسية
